په کاپیسا کې د ۳۷ میلیونه افغانیو په ارزښت د ۳.۴۷ کیلومتره سړک د جوړولو چارې پیل شوې
د کلیو بیارغونې او پراختیا وزارت د کلیوالي لار جوړونې ملي پروګرام له لوري د کاپیسا ولایت د حصه دوم کوهستان ولسوالۍ په دوو برخو کې د ۳۷ میلیونه افغانیو په ارزښت د ۳.۴۷ کیلومتره کانکریټي سړک او اوبو وتلو دلارو د جوړولو چارې پیل شوې.
په دې پروژه کې له سربند بالا تر سربند پایین کلي د ۱.۴۱ کیلومتره سړک او د حصه دوم کوهستان ولسوالۍ له مراد خواجه تر چهاراسیاب کلي پورې د ۲.۰۶ کیلومتره سړک جوړول راځي، چې په ترڅ کې یې زرګونه کاري ورځې رامنځته کیږي.
دیادو سړکونو په جوړولو سره به د ۲۶۰ کورنیو ترانسپورتي ستونزې نیغ په نیغه او د۳۰۰۰ کورنیو ستونزې په غیر مستقیم ډول هوارې شي او په اقتصادي چارو کې به یې د پام وړ مثبت بدلون راولي.
