په ننګرهار کې د ۳۲،۳ ميليونه افغانيو په ارزښت د ۲۲ پروژو چارې بشپړې او د ۷،۶ ميليونه افغانيو په ارزښت د دوو نورو پروژو چارې پيل شوې

د ننګرهارد کليو بيا رغونې او پراختيا رياست له لوري د ګوشتې ولسوالۍ په بيلابيلو سيمو کې د ۳۲،۳ ميليونه افغانيو په لګښت د کانالونو، استنادي ديوالونو، کانکريټي سړکونو او ويالو جوړولو چارې بشپړې او د ۷،۶ ميليونه افغانيو په لګښت د اوبو رسولو د دوو شبکو چارې پيل شوې. د ننګرهارد کليو بيا رغونې او پراختيا رييس انجينر امان الله مياخيل وويل ۲۲ پروژې دافغانستان لپاره د سويډن کميټې (SCA) په مالي لګښت بشپړې شوې دي او د او بو رسولو شبکې د کليو د بيا رغونې او پراختيا رياست داوبورسولو دپروګرام له لوري چې يوه شبکه د ۳،۹ ميليونه افغاينو په لګښت د ماليې وزارت (MOF)له بوديجې څخه جوړيږي چې ۲۷۳ کورنيو ته د څښاک اوبه برابروي او دويمه يې د ۳،۸ ميليونه افغاينو په لګښت د (UNCIEF) په مالي لګښت جوړيږي چې ۲۸۵ کورنيو ته به د څښاک پاکي اوبه برابرې کړي. ددې پروژو چارې به په شپږو مياشتو کې داړونده کليو دشوراګانو له لارې بشپړې شي چې د سيمې اوسيدونکو ته به ۳۸۰۰ کاري ورځې رامنځ ته کړي.