په ننګرهار کې د ۲۳۱ کورنیو لپاره د څښاک پاکې اوبه برابرې شوې
د کلیو د بیارغونې او پراختیا وزارت په کلیوالي سیمو کې د اوبو رسولو او حفظ الصحې د پروګرام له لوري د ننګرهار ولایت د اچین ولسوالۍ په خوږهخېل کلي کې د ۳ میلیونه افغانیو په لګښت د ۲۳۱ کورنیو لپاره د اوبو رسولو یوه لمریزه شبکه جوړه او د ځايي خلکو ګټې اخیستنې ته وسپارل شوه.
د اوبو رسولو ددغې پروژې د جوړولو په چارو کې د څه باندې ۲،۴۰۰ متره اوږدې د پایپونو د شبکې غځول، یوې ارتفاعي ذخیرې او د سولرونو لپاره د یوې احاطې جوړول، د ۲۰ سولرونو، په کورونو کې کې د مېترونو او ځینې نورو اړینو سامان آلاتو نصبول شامل وو.
د اوبو رسولو د یادې شوې پروژې د جوړولو چارو دغه راز د ځايي خلکو لپاره ۱،۹۰۰ کاري ورځې هم رامنځته کړې.
