په میدان وردګ کې د ۹ میلیونه افغانیو په ارزښت د کاریزونو د پاکولو او جوړولو چارې پیل شوې
د کلیو بیارغونې او پراختیا وزارت د سیمه یزې همغږۍ ملي پروګرام له لوري د میدان وردګ ولایت د جغتو ولسوالۍ په خواجه اب،جوشي او بهبود کلیو کې د کرنیزو ځمکو خړوبولو په موخه د دریو کاریزونو د پاکولو او جوړولو چارې د څه باندې نهه میلیونه افغانیو په ارزښت روانه اونۍ پیل شوې.
د یادو کاریزونو له ډلې د ٢١٠٠مترو په اوږدوالي په خواجه اب، د ١٠٤٢ مترو په اوږدوالي په جوشي او د ٥٩٢ مترو په اوږدوالي بهبود سیمو کې پاکاري او جوړیږي، چې په راتلونکې کې به د ٥٠٠ جریبه په شا او خوا کې کرنیزې ځمکې د اوبو لګولو تر منظم پوښښ لاندې راولي.
