په فراه کې ۸ پراختیایي پروژې ګټې اخیستنې ته وسپارل شوې
د کلیو بیارغوني او پراختیا وزارت د ولسي تړون ملي پروګرام له لوري د فراه ولایت مرکز اړوند په قلعه محمد، عسکر آباد، قلعه بهبود، ده خدایداد او همت آباد کلیو کې د ۲۸ میلیونو افغانیو په ارزښت ۸ پراختیایي پروژې بشپړې او ګټې اخیستنې ته وسپارل شوې. په دې پروژو کې د ښاري بریښنا د شبکې غځول، د اوبو لګولو کانال بیارغونه، د تجدید وړ انرژي، د څښاک د پاکو اوبو د څاګانو کیندل او د څښاک پاکو اوبو د شبکې جوړول شامل دي، چې کابو ۱۲۰۰ ګورنې یې له ګټې برخمنې شوې دي.
