په غویي میاشت کې څه باندې ۲۲۱،۰۰۰ کسانو ته د کرونا ویروس څخه د ځان ساتنې په اړه د عامه پوهاوي روزنې ورکړل شوې
د کلیو د بیارغونې او پراختیا وزارت، په کلیوالي سیمو کې د اوبو رسولو او حفظ الصحې د پروګرام، د حفظ الصحوي کارمنانو لخوا د هېواد په اتو ولایتونو لکه بادغیس، بامیان، دایکنډي، هلمند، کندهار، پکتیکا، بدخشان او ننګرهار کې څه د پاسه (۲۲۱۰۰۰) کسانو ته له کرونا وژونکي ویروس څخه د ځان ساتنې په موخه د عامه پوهاوي ټرېننګونه ورکړل شول.
د عامه پوهاوي په دغه ټریننګونو کې چې د اوبو رسولو او حفظ الصحې د پروګرام د ټولنې په مشرۍ د کاملې حفظ الحصې یا (سياِلټياِس) د کارمنانو لخوا تطبیق شول، خلکو ته لارښوونې وشوې چې له کرونا ویروس څخه د ځان ساتنې لپاره خپلې حفظالصحې ته جدي پاملرنه وکړي؛ لاسونه بیا بیا پرېمینځي، ټولنیز واټن مراعت کړي، له ګڼې ګوڼې لېرې و اوسي، ماسکونه وکاروي او د ټوخي یا پرنجي پرمهال خولې ته څنګل یا دستمال ونیسي.
په دې سربېره، د اوبو رسولو او حفظ الصحې د پروګرام د اړیکو څانګې له کرونا ویروس څخه د ځان ساتنې لپاره دوه ویډیويي کلیپونه هم جوړ کړل چې د وزارت له پاڼې څخه نشر شول.
