په بلخ ولایت کې به سږ کال ۹۸۱ ميليونه افغانیو په ارزښت ۳۹۱ پرمختیايي پروژې پلي شي
د کليو بیارغونې او پراختیا وزیر پوهنمل مجیب الرحمن کریمي نن د بلخ ولایت د ځینو قومي مشرانو سره د یاد ولایت د ستونزو د اوریده په موخه ولیدل.
د لیدنې په پیل کې د بلخ ولایت قومي مشرانو د کليو بیارغونې او پراختیا وزارت د پلي شویو پروژو څخه خوښي څرګنده کړه، چې په ښه کیفیت او روڼتیا سره پلي شوي او ورپسې د خپلې سيمې ستونزې او غوښتنې د کليو بیارغونې او پراختیا له وزیر سره شریکې کړې، چې د څښاک اوبو او د ولسي تړون ملي پروګرام نورو ولسوالیو ته غځول یې مهمې وبللې.
د کليو بیارغونې او پراختیا وزیر دوی ته وویل،" چې سږ کال به په بلخ کې د ۹۸۱ميليونه افغانیو په ارزښت ۳۹۱ پرمختیايي پروژې په بېلابېلو سکتورونو کې پلي شي او د دې ترڅنګ په بلخ کې ۱۳۹ ښوونځيو د ودانیو جوړولو چارې روانې دي."
د کلیو بیارغونې او پراختیا وزیر زیاته کړه، چې د ولسي تړون ملي پروګرام د بلخ ولایت چهارکنت، خلم، مارمل او بلخ ولسوالۍ تر پوښښ لاندې راوستي، چې په کې څه باندې ۳۵۰ پروژو کارونه روان دي او ولسي تړون به په لسو کالونو کې د هېواد هر کلی تر خپل پوښښ لاندې راولي.
