د کلیو د بیا رغونې او پراختیا وزارت سرپرست د خپل کاري سفر په ترڅ کې د کندز ولایت مرکز او ولسوالیو اړوندو سیمو له علماء کرامو، سپین ږیرو او مخورو سره وکتل
د کلیو د بیا رغونې او پراختیا وزارت سرپرست وزیر الحاج ملا محمد یونس اخندزاده شمالي ولایتونو ته د سفر په ترڅ کې نن له غرمې مخکې د کندز ولایت د کلیو د بیارغونې او پراختیا ریاست په دفتر کې د یاد ولایت له علماء کرامو، سپین ږیرو او مخورو سره لیدنه وکړه.
د لیدنې په پيل کې د کندز ولایت علماء کرامو، سپین ږیرو او مخورو ښاغلي وزیر صاحب ته دې ولایت ته د سفر ښه راغلاست ووایه او ویې ویل چې الحمدلله مونږ ته اسلامي امارت داسې زمینه برابره کړې تر څو خپلې ستونزې په اسانۍ سره تر لوړو مقاماتو او مرجع پورې ورسوو.
همداراز راغلو مخورو خپلې ستونزې له محترم وزیر صاحب سره شریکي کړې او زیاته یې کړه چې په تیرو شلو کلونو کې زمونږ سیمو ته هيڅ خدمت ندی شوی.
د کندز ولایت مخورو او سپین ږیرو د کلیو د بیا رغونې او پراختیا وزارت له مشرتابه څخه وغوښتل ترڅو په دې ولایت کې پراختیایي پروژې لکه سړکونه، پلچکونه، استنادي دیوالونه او داسې نورې پروژې تطبیق کړي او د معیاري سړکونو نشتون یې ستره ستونزه یاده کړه.
د کلیو د بیا رغونې او پراختیا وزارت سرپرست وزیر الحاج ملا محمد یونس اخندزاده د دې ولایت د مخورو او سپین ږیرو ستونزې او وړاندیزونه په غور سره واوریدل او ژمنه یې وکړه چې مونږ به د خپل شته توان او امکاناتو سره سم ستاسو ستونزو ته رسیدنه کوو.
