د کلیو د بیارغونې او پراختیا وزارت کې د مؤسساتو له استازو سره د همغږۍ غونډه ترسره شوه
د کلیو د بیارغونې او پراختیا وزارت د محترم وزیر الحاج ملا محمد یونس اخندزاده صاحب په مشري نن له غرمې مخکې د مؤسساتو له استازو سره د همغږۍ غونډه ترسره شوه.
په یاده غونډه کې چې د کلیو د بیارغونې او پراختیا وزارت په مقر کې جوړه شوې وه، د یاد وزارت محترم وزیر الحاج ملا محمد یونس اخندزاده صاحب، مرکزي رئیسانو، د یونیسف دفتر د واش څانګې مسؤول رولف لویندیک، د عامې روغتیا او پوهنې وزارتونو او مؤسساتو استازو ګډون کړی وو.
د غونډې په پیل کې د کلیو د بیارغونې او پراختیا وزارت محترم وزیر الحاج ملا محمد یونس اخندزاده صاحب میلمنو ته د ښه راغلاست ترڅنګ، د دې غونډې د اهمیت په اړه خپله ارزښتناکه وینا وکړه او وویل: چې موږ او تاسې باید د خپلو مظلومو افغانانو لاسنیوی او د شته امکاناتو په لرلو سره په بیلابیلو برخو کې هغوی ته اسانتیاوې برابري کړو ځکه چې دا زموږ مسؤولیت دی او باید د ستړیا احساس ونکړو.
دغه راز محترم وزیر صاحب زیاته کړل چې ټولو بیرته راستنیدونکو کډوالو لپاره باید په ښارګوټو او کمپونو کې د پاکو اوبو رسولو په برخه کې سهولتونه رامینځته او ستونزو ته یې پر وخت رسیدنه وکړو.
همداراز د مؤسساتو د استازو خبرې په غور واوریدل شوې او غونډه د دعائیې په ویلو سره پای ته ورسیده.
