د کلیو د بیارغونې او پراختیا وزارت له لوري په کاپيسا ولایت کې سربندونه او کانالونه جوړیږي
د کليو د بيارغونې او پراختيا وزارت له لوري د کاپيسا ولايت په (۶) بيلابيلو ولسواليو کې د څه باندې (۱۲) ميليونه افغانيو په لګښت سربندونه او کانالونه جوړيږي.
چې له جملې څخه یې د یاد ولایت په تګاب او حصه اول ولسوالیو کې د یو سربند او دوو کانالونو د جوړولو چارې نن د یو لړ مراسمو په ترڅ کې د دغه وزارت د سرپرست وزیر الحاج ملا محمد یونس اخندزاده او مل پلاوي له لوري عملا پیل شوې.
په یاده پرانیست غونډه کې د کلیو د بیارغونې او پراختیا وزارت سرپرست الحاج ملا محمد یونس اخندزاده، مل پلاوي، د کاپیسا ولایت والي قاري احسان الله بریال، د یاد ولایت د کلیو د بیارغونې او پراختیا رئیس مفتي سید ابرار، یو شمیر مسوولینو، د سیمې علماء کرامو، سپینږیرو او مخورو ګډون کړي وو.
د یادو پروژو د کار په جریان کې به سلګونه تنه کاریګرو ته د کار زمینه برابره شي او د دغو پروژو په بشپړيدو سره به په اړوندو برخو کې د يادو ولسواليو د ولسونو ستونزې هوارې شي.
