د کلیو د بیارغونې او پراختیا وزارت له لوري په پروان ولایت کې کانالونه، سربندونه او سپر پسیج پروژې پلې کیږي
د کلیو دبیارغونې او پراختیا وزارت له لوري د پروان ولایت په نهه بیلابیلو ولسوالیو کې د څه باندې (۱۵) پنځلس میلیونه افغانیو په لګښت سپر پسیج، کانالونه او سربندونه جوړیږي.
چې له جملې څخه یې د یاد ولایت په بګرام او سیاه ګرد ولسوالیو کې د یوه سپر پسیج او یو کانال چارې د یو لړ مراسمو په ترڅ کې د دغه وزارت د سرپرست وزیر الحاج ملا محمد یونس اخندزاده او مل پلاوي له لوري عملا پیل شوې.
په یاده پرانیست غونډه کې د کلیو د بیارغونې او پراختیا وزارت سرپرست الحاج ملا محمد یونس اخندزاده، مل پلاوي،د یاد ولایت د کلیو دبیارغونې او پراختیا رئیس ملا عبدالصمد صادق، یو شمیر مسوولینو، د سیمې علماء کرامو ، سپین ږیرو او ځوانانو ګډون کړی وو.
د یادو پروژو د کار په جریان کې به سلګونه تنه کاریګرو ته د کار زمینه برابره شي او د دغه پروژو په بشپړیدو سره به په اړوندو برخو کې د یادو ولسوالیو د ولسونوستونزې هوارې شي.
