د کلیو د بیارغونې او پراختیا وزارت له لوري د مؤسساتو له استازو سره د همغږۍ غونډه ترسره شوه
د کلیو د بیارغونې او پراختیا وزارت د محترم وزیر الحاج ملا عبداللطیف منصور صاحب په مشرۍ د مؤسساتو له استازو سره د اوبو او روغتیا ساتنې په تړاو د همغږۍ غونډه ترسره شوه.
په یاده غونډه کې چې د کلیو د بیارغونې او پراختیا وزارت په مقر کې جوړه شوې وه، د یاد وزارت محترم وزیر الحاج ملا عبداللطیف منصور صاحب، مرکزي رئیسانو، د یونیسف دفتر او د نورو مؤسساتو استازو ګډون کړی وو.
د غونډې په پیل کې د کلیو د بیارغونې او پراختیا وزارت محترم وزیر الحاج ملا عبداللطیف منصور صاحب میلمنو ته د ښه راغلاست ترڅنګ، د څښاک پاکو اوبو د برابرولو په برخه کې ټینګار وکړ او وویل: په هغو سیمو کې د اوبو رسولو پروژو ته اولویت ورکړ شي چیرته چې اړتیا لیدل کیږي. په اوسني حالت کې د اوبو رسولو او روغتیا ساتنې پروګرامونه باید د کډوالو کمپونو ته لومړیتوب ورکړي ځکه چې د هوا په ګرمېدو سره په دغو کمپونو کې د څښاک پاکې اوبه برابرول د کډوالو په ځانګړې توګه ماشومانو لپاره ډیر اړین دی.
دغه راز محترم وزیر صاحب متوازن انکشاف ته اشاره وکړه او زیاته یې کړه چې پراختیايي پروژې باید د خلکو د اړتیاوو په اساس پلې شي او د همکارو مؤسساتو ترمنځ همغږي پياوړی شي څو له تکراري پروژو څخه ډډه وشي.
همداراز محترم وزیر صاحب د مؤسساتو د استازو خبرې په غور واوریدې او غونډه د دعائیې په ویلو سره پای ته ورسیده.
