د کلیو بیارغونې او پراختیا وزیر د منګلو قوم له مشرانو او ځوانانو سره د دوی د ستونزو د حل په موخه ولیدل
د کلیو بیارغونې او پراختیا وزیر پوهندوی مجیب الرحمن کریمي د منګلو د قوم عالي کمېسیون له مشرانو او غړو سره په جنوب ختیځ زون کې د مېشتو ولسونو د ستونزو د حل په موخه ولیدل.
د لیدنې په پیل کې قومي مشرانو د څښاک اوبو، د سړکونو او پلونو د جوړولو ستونزې شریکې کړې.
همدارنګه یې قلندر، موسي خیلو، جانې خيلو، مېرزکې او لژې ولسوالیو ته د ولسي تړون ملي پروګرام د غځولو او په کې د ملي دسترخوان ملي پرورګرام د ژر پیل غوښتنې وکړې.
د کلیو بیارغونې او پراختیا وزیر وویل، ولسي تړون په لومړي پړاو کې د هېواد د ۳۴ ولایتونو په ۱۲۳ ولسوالیو کې پلی کېږي، چې په دویم او درېم پړاو کې به ټول هېواد تر خپل پوښښ لاندې راولي.
د کلیو بیارغونې او پراختیا وزیر زیاته کړه، د ملي دسترخوان پروګرام له لارې د هېواد څه باندې اووه لکه کورنیو ته مرستې ویشل شوي او دا پروګرام به د هېواد ۹۰ سلنه کورنۍ تر خپل پوښښ لاندې راولي.
