د هېواد جمهور رئیس محمد اشرف غني د کلیو بیارغونې او پراختیا وزارت د چارو او لاسته راوړنو راپور واوریدو
د افغانستان اسلامي جمهوري دولت جمهور رئیس محمد اشرف غني ته د کلیو بیارغونې او پراختیا وزارت رهبرۍ د یاد وزارت د چارو او فعالیتونو راپور وړاندې کړو.
د لیدنې په پیل کې د کلیو بیارغونې او پراختیا وزیر پوهندوی مجیب الرحمن کریمي د هېواد په کلیو کې په بېلابیلو سکتورونو کې د پلې شویو او پلې کېدونکو پروژو راپور په مفصله بڼه وړاندې کړ.
د هېواد ولسمشر د راپور له اوریده وروسته د پروژو په برخه کې په انډولیزتوب، اغېزمنتوب او اقتصادي پاېښت په برخه کې د لا ډیرې پاملرنې په موخه سپارښتنې وکړې.
ولسمشر همدرنګه وویل، چې د کلیوالي شوراګانو لپاره باید داسې میکانیزم جوړ شي، چې نیغ په نېغه د حکومت سره خپلې ستونزې، غوښتنې او سپارښتنې شریکې کړي، تر څو د دولت، خلکو، ولسوالیو، ښارونو او کلیو ترمنځ اړیکې لا غښتلي شي.
جمهور رئیس زیاته کړه، د پروژو انډولیزتوب، پاېښت، کیفیت، په لږ لګښت د غوره او ښو اقتصادي پروژو پلې کول او د خلکو د ستونزو او غوښتونو په اساس د پروژو ټاکل د خلکو په ژوند کې مثبت تغییر را وستلی شي.
