د خوست او بلخ ولایت اوسېدونکو ته په ګروپونو کې د غړیتوب په اړه د لومړنیو روزنو پېل
د کلیو بیارغونې او پراختیا وزارت د کلیوالي اقتصاد د پياوړتیا ملي پروګرام د ۸۴ نویو جوړ شویو سپماګروپونو ۸۰۹ غړو ته د بلخ ولایت په بلخ ولسوالۍ او د خوست ولایت په اسماعیل خېل مندوزي ولسوالۍ کې له سپماګروپونو سره د غړیتوب لومړنۍ روزنې ورکړل شوې.
د کلیوالي اقتصاد د پیاوړتیا ملي پروګرام د موخو په اړه وضاحت، د سپماګټې او په سپماګروپ کې د غړیتوب ترلاسه کولو پروسه هغه موضوعات وو، چې په دې روزنو کې د پروګرام ګټه اخیستونکو ته وړاندې شول.
سربېره پر دې، د کلیوالي اقتصاد د پياوړتیا ملي پروګرام د مرکزي دفتر د کارکوونکو د سپماګروپونو، د پور او سپما له کلیوالي اتحادیو لیدنه وکړه او هغوی ته یې له یادو بنسټونو څخه په اغیزمنه توګه د ګټې اخیستنې په اړه سپارښتنې وکړې.
