په غزني ولایت کې د یوه اوسپنیز کانکریټي پُل د جوړولو چارې پيل شوې
د کلیو د بیارغونې او پراختیا وزارت د کلیو ودانیزو چارو مرستیال الحاج محمد ارسلاح خروټي او مل پلاوي له خوا د غزني ولایت د آب بند ولسوالۍ په دالانو کلي کې د شاوخوا (۲۳) میلیونه افغانیو په لګښت د (۸۰) مترو په اوږدوالي د یوه اوسپنیز کانکریټي پُل د جوړولو چارې د یوې غونډې په ترڅ کې پيل شوې.
په دې پرانیست غوڼډه کې د کلیو د بیارغونې او پراختیا وزارت د کلیو ودانیزو چارو مرستیال ښاغلی الحاج محمد ارسلاح خروټي، د یاد وزارت د کلیوالي سړک جوړولو رئیس الحاج مولوي محمد قاسم امیني، د ولایت مقام خاص استازی الحاج شیخ الحدیث مولوي موسی جان ابراهیم، د غزني ولایت د کلیو د بیارغونې او پراختیا رئیس الحاج مولوي حضرت یوسف صهیب، د اقتصاد رئیس ملا مولا داد حسن، د آب بند ولسوالۍ ولسوال ملا عبدالله منتقیم، د یادې ولسوالۍ یو شمیر علماوو، سپین ږیرو او ځوانانو ګډون کړی وو.
په دې غونډه کې د کلیو ودانیزو چارو مرستیال د یادې پروژې د اهمیت په اړه ارزښتناکه وینا وکړه او وویل: په تېرو څو کلونو کې غزني ولایت کې ډيرې کمې پراختیایي پروژې پلي شوي، په راتلونکي کال کې به غزني ولایت ته ځانګړې پاملرنه وشي.
د یاد پُل د کار په بهیر کې به لسګونه تنه کاریګرو ته د کار زمینه برابره او په بشپړېدو سره به يې د نوموړي کلي د اوسیدونکو ترانسپورتي او تګ راتګ ستونزې هوارې شي.
