د کلیو د بیارغونې او پراختیا وزارت سرپرست وزیر په افغانستان کې د ملګرو ملتونو د ځانګړي استازي له مرستیال او مل پلاوي سره وکتل
د کلیو د بیارغونې او پراختیا وزارت سرپرست وزیر الحاج ملا محمد یونس آخندزاده نن په خپل کاري دفتر کې په افغانستان کې د ملګرو ملتونو د ځانګړي استازي له مرستیال اندریکا راتوتي او مل پلاوي سره لیدنه وکړه.
د لیدنې په پیل کې په افغانستان کې د ملګرو ملتونو مرستیال وزیر صاحب سره د خپلو فعالیتونو په تړاو معلومات شریک کړل او وویل چې د کلیو د بیارغونې او پراختیا وزارت یو مهم او سکتوري وزارت دی چې په کلیوالې سیمو کې د پروژو پلې کولو کې مهم رول لري او غواړو چې د بشرې مرستو څخه د پراختیایې پروژو د تطبیق په لور روان سو.
همداراز ښاغلي اندریکا راتوتي د مهمو پروژو په ځانګړي ډول د واش په برخه کې د وزارت له همکاریو څخه مننه وکړه او زیاته یې کړه چې موږ پلان لرو ترڅو د اوبو رسولو په برخه کې د دغه وزارت سره لا زیات کار وکړو.
ورپسې د کلیو د بیارغونې او پراختیا وزارت سرپرست وزیر الحاج ملا محمد یونس اخندزاده راغلو میلمنو ته ښه راغلاست ووایه او ويې ویل د پراختیایې پروژو پلې کول یو مهم او اړین ګام دی او باید تر بشري مرستو بنسټیزو پروژو ته لومړیتوب ورکړل شي.
همدارنګه ښاغلې وزیر صاحب د خپلو خبرو په ترڅ کې زیاته کړه چې زمونږ مسؤولیت دا دی څو د خلکو د لومړیتوبو په پام کې نیولو سره پروژې په شفاف او ښه کیفیت ترسره شې ترڅو هیوادوالو ته یې دوامداره ګټه ورسیږي.
د دې لیدنې په پای کې دواړو لورو پر دوامدارو همکاریو ټینګار وکړ.
