په میدان وردګو کې د ۲میلیونو افغانیو په ارزښت شا او خوا ١٩٠ کورنیو ته د څښاک پاکې اوبه برابرې شوې
د کلیو بیارغونې او پراختیا وزارت د اوبو رسولو او روغتیا ساتنې ملي پروګرام له لوري د میدان وردګو ولایت د میدان ښار اړوند په کوډګي امرخیل او د نرخ ولسوالۍ په لوی شاکابل سیمو کې د ۲میلیونو افغانیو په ارزښت ۱۹۰ کورنیو ته د څښاک د پاکو اوبو رسولو یوه شبکه او یوه حلقه څاه تر بشپړې څارنې وروسته ګټې اخیستنې ته وسپارل شوې.
دا پروژې په داسې مهال کې ګټې اخیستنې ته سپارل کیږي، چې تر دې وړاندې د یادو سیمو لسګونو کورنیو د څښاک پاکو اوبو ته یې بشپړ لاس رسی نه درلود او یا یې د اړتیا وړ پاکې اوبه له لرې پرتو کلیو څخه راوړلې.
