په زابل کې دیوه ښوونځي دجوړیدو چارې پای ته رسیدلي او دهیواد په نورو څلورو ولایتونو کې به ۵ ښوونځي ډیر ژر جوړ شي
د کلیو بیا رغونې او پراختیا وزارت د ولسي تړون د اقرا ملي پروګرام تر سیوري لاندې د زابل ولایت په مرکز قلات ښار کې دیوه ښوونځي دجوړیدو کارپای ته رسېدلی او په کندز،خوست، کابل او بلخ ولایتونو کې به ډیر ژر ۵ نور ښوونځي جوړ او ګټې اخستنې ته وسپارل شي.
دا ښوونځي دکندز په چهاردره او امام صاحب، دخوست په تڼیو، دکابل په قره باغ او دبلخ په بلخ ولسوالیو کې جوړیږي، چې ۱۲، ۱۰، ۸ یا ۶ ټولګي، تشنابونه اوددڅښاک داوبو څاګانې به ولري، ددې ښوونځیو دجوړیدو په ترڅ کې ماهرو اوغیر ماهرو کارګرو لپاره ۱۳زره او۶۲۲ کاري ورځې رامنځ ته شوي.
باید ووایو چې جوړ شوي ښوونځي ۱۹۶۱ زده کوونکو ته دزده کړې وړ چاپیریال رامنځ ته کړی دی او ۱۳۰۶ نور زده کوونکي به دنویو ښوونځیو په جوړیدو سره د زدکړو وړ چاپریال تر لاسه کړي.
