د ننګرهار ولایت د تورخم سیمې عمري کمپ کې د اوبو رسولو یوې شبکې د جوړولو چارې پيل شوې
د کلیو د بیارغونې او پراختیا وزارت له لوري د ننګرهار ولایت د تورخم سیمې په عمري کمپ کې د شاوخوا (۱۱) میلیونه افغانیو په لګښت د اوبو رسولو یوې شبکې د جوړولو چارې نن د یو لړ مراسیمو په ترڅ کې د دغه وزارت د محترم وزیر الحاج ملا محمد یونس اخندزاده صاحب له خوا پيل شوې.
د دې شبکې د پیل په پار جوړ شوې مراسیمو کې د کلیو د بیارغونې او پراختیا وزارت محترم وزیر الحاج ملا محمد یونس اخندزاده صاحب، مل پلاوي، د ننګرهار ولایت د کلیو د بیارغونې او پراختیا رئيس مولوي قسمت الله مبارز، د عمرې کمپ مسؤول محمد هاشم میوندوال او د مهاجرینو د کميټې یو شمیر غړو ګډون کړی وو.
په یاده شبکه کې د (۱۰۰) مترو په ژوروالي د یوې څاه کیندل، د (۱۰۰۰) متر مکعب په وړتیا د پاکو اوبو دوو ذخیرو جوړول، د (۴۰۰۰) مترو په اوږدوالي پایپ غځول، د (۲۸) سولر تختو او (۲۶) شیردهنونو نښلول شامل دي.
د یادې شبکې د کار په جریان کې به لسګونه تنه کاریګرو ته د کار زمینه برابره او په بشپړیدو سره به يې د نوموړي کمپ (۱۰۰۰۰۰) تنه کډوال د څښاک پاکو اوبو ته لاسرسی پيدا کړي.
