د کليو بیارغونې او پراختیا وزیر د هند هېواد له سفیر سره د ۱،۵ ميليونه ډالرو په ارزښت د درو پرمختیایي پروژو هوکړه لیک لاسلیک کړ
د کليو بیارغونې او پراختیا وزیر پوهنمل مجیب الرحمن کریمي د افغانستان اسلامي جمهوري دولت د اجرایه رييس ډاکټر عبدالله عبدالله په حضور کې د هند هېواد له سفیر ویني کمار سره د درو پرمختیایي پروژو هوکړه لیک لاسلیک کړ.
د کليو بیارغونې او پراختیا وزیر ددې درو پرمختیايي پروژو په اړه وویل، چې یوه یې په بادغیس کې د اوبو رسولو کانال دی، چې ۲۴۳۹ متره اوږدوالی لري او ۱۳۵۱ جریبه کرنیزه ځمکه به خړوبوي، د دې ترڅنګ په دې پروژه کې د ۲۷۸ متره محافظوي دیوال جوړول هم شامل دي، چې ۸۵ جریبه کرنیزه ځمکه به د سیلابونو له خطره خوندي کړې، دوهمه پروژه هم د بادغیس ولایت په مقر ولسوالۍ کې د استنادي دیوال جوړول دي او درېیمه هغه یې د کابل ولایت په پلچرخي سېمه کې ۲۷۱۰ متره سړک جوړول دي، چې په دې ټولو پروژو ۱،۵ ميليونه ډالره لګښت کېږي او د دوست هېواد هندوستان لخوا ورکول کېږي.
