په ننګرهار ولایت کې راستنېدونکو کډوالو لپاره د اوبو رسولو پراختیايي پروژو چارې پيل شوې
د کلیو د بیارغونې او پراختیا وزارت له لوري د ننګرهار ولایت د خوګياڼو، روداتو، پچيراګام ولسواليو په نویو کمپونو کې د راستنېدونکو کډوالو لپاره د څښاک پاکو اوبو رسولو (۹) شبکو د جوړولو او په سرخرود او بهسودو ولسواليو کې د اوبو رسولو (۲۰) شبکو او (۵۰) څاګانو د ترميم چارې د شاوخوا (۱) ميليون امريکايې ډالرو په لګښت د یوې غونډې په ترڅ کې د دغه وزارت د محترم وزیر الحاج ملا محمد یونس اخندزاده صاحب له خوا پیل شوې.
په دې غونډه کې د کلیو د بیارغونې او پراختیا وزارت محترم وزیر صاحب، مل پلاوي، د ننګرهار ولایت والي الحاج ملا ګل محمد اخند، د دغه ولایت د عامې روغتيا رئیس مولوي امين الله شريف، د یاد ولایت د کلیو د بیارغونې او پراختیا رئيس مولوي قسمت الله مبارز، د دغه ولایت یو شمیر نورو مسؤولینو، علماء کرامو، سپین ږیرو او ځوانانو ګډون کړی وو.
په یاده غونډه کې وزیر صاحب خپله ارزښتناکه وینا وکړه او وویل: دا زموږ اراده ده چې ټولو هغو خلکو ته چې هېواد ته بیرته راستانه شوي دي او د پاکو اوبو نشتوالي سره مخ دي د خپلو امکاناتو په کتو سره به د څښاک پاکو اوبو زمينه برابره کړو.
د یادو پروژو د کار په جریان کې به سلګونه تنه کاریګرو ته د کار زمینه برابره او په بشپړیدو سره به یې د نوموړیو کمپونو زرګونه تنه کډوال د څښاک پاکو اوبو ته لاسرسی پيدا کړي.
