په لغمان ولایت کې په یوه میاشت کې ۴۴ غالۍ او ټغرونه اوبدل شوي دي
د کلیو بیارغونې او پراختیا وزارت د کلیوالي اقتصاد د پیاوړتیا ملي پروګرام په چوکاټ کې یوازې په تېره یوه میاشت کې ۴۴ غالۍ او ټغرونه په لغمان ولایت کې تولید او مارکېټ ته وړاندې شويدي.
د کليوالي اقتصاد د پیاوړتیا ملي پروګرام په چوکاټ کې د لغمان په مرکز او قرغیو ولسوالۍ کې ۳۷۰ تنو راستانه شویو کډوالو کورنیو باندې د غالیو کارګاوې او اړونده مواد ویشلي چې تېره میلادي میاشت کې ۴۴ د بیلا بیلو کچو غالۍ او ټغرونه اوبدل شويدي.
مارکېټ ته ددغو وړاندې شویو غالیو او ټغرونو مجموعي قیمت تر ۴۰۵۲۹۶ افغانیو پورې رسیږي.
دغه چارې ورځ تربلې مخ په پراخېدو دي او هره اوبدل شوې غالۍ او ټغرونه په مارکېټ کې په خورا ښه او لوړه بیه پلورل کیږي.
د یادونې وړ ده، چې د غالیو د اوبدلو سره د ډیرو کورنیو اقتصادي ستونزې حل شوېدي.
