په روزګان کې د څه باندې ۳ میلیونه افغانیو په لګښت د اوبو رسولو د یوې لمریزې شبکې چارې بشپړې شوې
د کلیو د بیارغونې او پراختیا وزارت په کلیوالي سیمو کې د اوبو رسولو او حفظالصحې د پروګرام له لوري د روزګان ولایت د ترینکوټ ولسوالۍ په ګارو سرشخلي کلي کې د اوبو رسولو یوه لمریزه شبکه جوړه شوه چې په نږدې راتلونکې کې به ګټې اخیستنې ته وسپارل شي.
د اوبو رسولو په دغه شبکه باندې په ټوله کې څه باندې ۳ میلیونه افغانۍ ولګېدې چې د یونیسف ادارې لخوا ورکړل شوې. د یادې شوې پروژې په بشپړېدو سره د شاوخوا ۳۰۰ کورنیو لپاره د څښاک پاکې اوبه برابرې شوې.
د اوبو رسولو په دغه پروژه کې د یوې ژورې څاه کیندل، د یوې هسکې زیرمې او د سولرونو لپاره د یوې احاطې جوړول، د ۱۸ لمریزو ښیښو یا سولرونو، د ۳،۶۷۰ متره اوږدې شبکې جوړول او ځینو نورو اړینو پرزو نصبول شامل وو.
د اوبو رسولو ددغې پروژې چارو د ځايي خلکو لپاره شاوخوا ۴۰۰ کاري ورځې هم رامنځته کړې.
