د کلیو بیا رغونې او پراختیا وزیر د بدخشان د ولایتي شورا له غړو سره وکتل
د کلیو بیا رغونې او پراختیا وزیر مجیب الرحمن کریمي ددوشنبې پر ورځ ( ۱۱ لیندۍ) بدخشان ته د خپل سفر په ترڅ کې د دغه ولایت د ولایتي شورا له غړو سره ناسته درلوده، د ولایتي شوراغړو ښاغلي کریمي ته له هرکلي وروسته خپلې اړتیاوې شریکې کړې چې د سړکونو او پلونو پر جوړولو راټولې وې، ښاغلي کریمي په ځواب کې ورته وویل (( د کلیو بیا رغونې او پراختیا وزارت ژمن دی چې په دغه ولایت کې د سړکونو، پلونو او پلچکونو جوړولو پروژو ته لومړیتوب ورکړي، دې وزارت جمهوري ریاست ته یوه طرحه وړاندې کړې ده چې پر بنسټ به یې د ولایتونو د دویمې درجې لرونکو سړکونو جوړول هم له فواید عامې وزارته د کلیو بیا رغونې او پراختیا وزارت ته وسپارل شي که دا طرحه تاید شي د بدخشان ټول د اړتیا وړ سړکونه به سروې شي او په ټاکلي وخت کې به جوړ شي)) د کلیو بیا رغونې او پراختیا وزیر ژمنه وکړه چې د بدخشان د خلکو ستونزې او غوښتنې به له اړوندو پروګرامونو سره شریکې کړي او هغوی ته به دنده وسپاري چې په کره ډول یې حل لارې ولټوي.
