د کرونا ویروسي ناروغي په اړه د عامه پوهاوي پروګرام
د کلیو د بیارغونې او پراختیا وزارت د کلینیک روغتايي ټیم لخوا د یاد وزارت کارکونکو ته د کورونا ویروس په اړه د عامه پوهاوي پروګرام جوړ شو.
دغه پروګرام د وزارت د مالي او اداري معین معراج الدین شمس لخوا د دې حدیث شریف په بیانولو چې "پاکي د ایمان برخه ده" پیل شو، او د وزارت کارکونکو ته يې په خپلو خبرو کې وویل.
"موږ ټول اړتیا لرو چې زموږ په کاري ځای کې د حفظ الصحې مهمو ټکو ته پاملرنه وکړو او تر خپل وسه پورې له دې ناروغۍ سره مبارزه وکړو."
د وزارت د کلینیک روغتايي ټیم لخوا د وزارت کارکونکو ته د یوه پریزنټیشن له لارې د یاد ویروس په اړه جزیات، د ویروس تاریخ، د ناروغانو شمیر، د ویروس خپریدنه، درملنه او د ثبت شویو پیښو په اړه مهم معلومات وړاندي شول.
دغه پروګرام، چې د نړیوالي ویروسي ناروغي د عامه پوهاوي په هدف جوړ شوی و، د وزارت ۲۰۰ تنو کارکونکو پکې برخه اخیستې وه. د پروګرام په پای کې ، د وزارت امنیتي مسؤلینو د امنیت له پلوه د کرونا ویروسي ناروغۍ دخپرېدو او د مخنیوي په اړه خپلې لارښوونې وړاندې کړې.
