د کلیو د بیارغونې او پراختیا وزارت د اوبو رسولو او روغتیا ساتنې ریاست د پروژو د سروې، ډیزاین او تطبیق تخنیکي ورکشاپ دویمه دوره پای ته ورسېده
د کلیو د بیارغونې او پراختیا وزارت په کلیوالي سیمو کې د اوبو رسولو او روغتیا ساتنې ریاست، د یاد ریاست د ولایتي انجنیرانو او کارکوونکو د وړتیا د لوړولو په موخه، د اوبو رسولو د پروژو د سروې، ډیزاین او تطبیق تر عنوان لاندې د څلور ورځنې ورکشاپ دویمه دوره نن د یوې غونډې په ترڅ کې پای ته ورسېده.
په یاده غونډه کې چې د کلیو د بیارغونې او پراختیا وزارت د انسټیټوټ په تالار کې جوړه شوې وه، د کلیو د بیارغونې او پراختیا وزارت سرپرست وزیر الحاج ملا محمد یونس آخندزاده، د اوبو رسولو او روغتیا ساتنې رئیس مولوي بخت منیر محمد، د دفتر رئیس مولوي میرزا محمد شکیب، د وزارت د انسټيټوټ رئیس مولوي خیال محمد عاصم، د تمویل کوونکو مؤسسو مشر ډاکټر حیات الله، ، د کلیوالي اوبو لګولو د ودانیزو چارو رئیس اسدالله عمار، د اطلاعاتو او عامه پوهاوي رئيس او ویاند ملا نورالهادي عادل او د وزارت کارکوونکو ګډون کړی وو.
د غونډې په پیل کې د کلیو د بیارغونې او پراختیا وزارت سرپرست وزیر الحاج ملا محمد یونس آخندزاده د کارکوونکو د وړتیا د لوړولو په برخه کې د یاد ورکشاپ د اهمیت په اړه خپله ارزښتناکه وینا وکړه او وویل: د کلیو د بیارغونې او پراختیا وزارت او خلک له تاسو غواړي چې د پراختیايي پروژو د سروې، ډیزاین او تطبیق په برخه کې له دقت، ریښتنولۍ او صداقت څخه کار واخلئ.
دغه راز د وزارت سرپرست وزیر زیاته کړه مسؤلیت یو امانت دی، کوښښ وکړئ چې خپل مسؤلیتونه په سمه توګه او په ښه نیت سره ترسره او د اوبو رسولو د پروژو په تطبیق کې خپلې تجربې له نورو انجنیرانو سره شریکې کړئ.
یاده غونډه د تصدیق نامو په ورکولو او د کلیو د بیارغونې او پراختیا وزارت د اوبو رسولو او روغتیا ساتنې رئیس مولوي بخت منیر محمد په دعائیه سره پای ته ورسیده.
