په نورستان کې د ۱.۸ میلیونه افغانیو په لګښت د محافظوي دیوال کار بشپړ شو
د کلیو بیارغونې او پراختیا وزارت د ولسي تړون ملي پروګرام له لوري د نورستان ولایت د دواب ولسوالۍ په بهاردیس کلي کې د۱.۸ میلیونه افغانیو په لګښت د ۱۲۶ مترو په اوږدوالي محافظوي دیوال جوړ او ګټې اخستنې ته وسپارل شو.
دغه دیوال د سیمې ۲۷۵ جریبه کرنیزه ځمکه او ګڼ کورونه د سېلابونو له ګواښه خوندي کړل . او له ګټو یې د یاد کلي ۱۱۲ کورنۍ برخمنې شوې چې د کاري جریان پرمهال د سیمې تخنیکي او غیرتخنیکي کاریګرو ته ۱۴۶۷ کاري ورځې هم برابرې شوې.
ولسي تړون ملي پروګرام د نورستان په دوآب ولسوالۍ کې په مختلفو سکتورونو کې ۶۶ پروژې تطبیقوي، چې سیمه والو ته به ګڼې اسانتیاوې برابرې کړي.
