په ننګرهار کې د ۲۹۶ متره اوږد محافظوي دیوال د جوړولو کار روان دی
په ننګرهار ولایت کې د کلیو د بیا رغونې او پراختیا وزارت د سیمه ییز پروګرام له لوري د محافظوي دیوال د جوړولو کار ۲۰ سلنه مخ ته تللی دی. د دغې پروژې په ترڅ کې د یاد ولایت د سپین غر ولسوالي په لوخي کلي کې له معیارونو سره سم د ۲۹۶ مترو په اوږدوالي پوخ محافظوي دیوال د جوړیدو په حال کې دی.
د یادې پروژې د تطبیق پر مهال ۱۴۳۸ کاري ورځې رامنځته کیږي او په بشپړیدو به یې د سیمې ۲۲۴۰ اوسیدونکي ترې په مستقیم ډول ګټه پورته کړي. د یادونې وړ ده چې د دغې پروژې له لارې به هلته نه یواځې د ځايي بزګرانو لسګونه جریبه کرهڼیزه ځمکه بلکې د سیمې ګڼ شمیر کورونه هم د سیلابونو له ګواښ څخه خوندي کړلی شي.
