د ( چهار شنبه علمي) اتم سیمینار د « غذايي امنیت او پر کلیوالي پرمختیا یې اغیز» تر سرلیک لاندې تر سره شو
د افغانستان د کلیو پراختیا انسټیټیوټ د «چهار شنبه علمي» اتم سیمینار د « غذايي امنیت او پر کلیوالي پرمختیا یې اغیز» تر سرلیک لاندې د کب پر ۲۷مه نیټه په انلاین بڼه د تغذي د کارپوه د ډاکټر محمد همایون لودین په وینا سره پیل شو چې د وزارت ۶۰ تنو مرکزي کارکوونکو په کې برخه واخسته.
ښاغلي لودین د خپل پریزینټیشن په ترڅ کې تغذیې، د خوراک د څرنګوالي او د کلیو د پراختیا په موخه د خوارځواکۍ د مخنیوي په اړه خبرې وکړې او ویې ویل« تغذیه یوازې د روغتیا یوه برخه نه ده بلکې د ټولنې او فرد د روغتیا بنسټیز توکی دی کله چې یو تن اړینه تغذیه ونه لري او خوارځواکۍ وهلی وي کلي او خپل ژوندانه ته ګټور نه پریوځي، نو د روغتیا لپاره په خوراکي رژیم کې رنګا رنګي راوستل ګټوره چاره بلل کیږي»
ډاکټر لودین وویل چې د ژوندانه لومړۍ ۱۰۰۰ ورځې د زرینو ورځو یا د فرصتونو د دریڅې په نامه یادیږي چې په دې وخت کې د مور او ماشوم تغذیه د کس د راتلونکي ژوند ضمانت کوي او د کلیو بیا رغونې او پراختیا وزارت په کلیو کې د دې ۱۰۰۰ زرینو ورځو د پوهاوي په پایله کې د خلکو په ژوندانه کې ګټور بدلون راوستی شي.
د سیمینار په پای کې د وزارت مشرتابه ډاکټر لودین د مننې په لوحه ولمانځه او د هغه د همکارۍ مننه یې وکړه.
