د کلیو د بیارغونې او پراختیا وزارت محترم وزیر صاحب د بادغیس ولایت د قادس ولسوالۍ د لوی بند د جوړولو د کار له بهير څخه ليدنه وکړه
د کلیو د بیارغونې او پراختیا وزارت محترم وزیر الحاج ملا محمد یونس اخند زاده صاحب او مل پلاوي د بادغیس ولایت د قادس ولسوالۍ د لوی ذخيروي بند د جوړولو د کار له بهير څخه ليدنه وکړه.
د قادس لوی بند د بادغیس له مرکز قلعه نو څخه په (۷۰) کیلومتري کې موقعیت لري او د قادس سیند د اوبو مهارولو او د سیلابونو په مخنیوي کې خورا رول لري.
د نوموړي بند د کاسي د اوبو ظرفیت تقریبا (۳) میلیونه متر مکعب دی او د (۳۲) مترو په ارتفاع سره د (۱۲،۵) میلیونه امریکايې ډالرو په لګښت د وزارت له پراختیایې بودیجې څخه جوړیږي.
د قادس لوی بند چارې څه باندې (۶۰) سلنه پرمخ تللي او دغه بند یوه حیاتي او ټولګټه پروژه ده چې د قادس ولسوالۍ د کلیوالو په ژوند کې اړین رول لري، د یاد بند په جوړولو سره به د اوسیدونکو زراعت او مالداري وده او د خلکو اقتصاد به ښه شي.
د دغه لوی بند په بشپړیدو سره به (۱۴۰۰) هکتاره کرنیزه ځمکه خړوبه او د سیمې اوسیدونکو ته به د زراعت په برخه کې کاري فرصتونه برابر شي.
