د کليو بیارغونې او پراختیا وزیر د اسیا لپاره د ملگرو ملتونو د پرمختیايي پروګرام له مشر سره ولیدل
د کليو بیارغونې او پراختیا وزیر پوهنمل مجیب الرحمن کریمي د اسيا لپاره د ملګرو ملتونو د پرمختیایي پروګرام له مشر هالیین (Haolian) سره، د افغانستان لپاره د ملګرو ملتونو د پرمختیايي پروګرام د فعالیتونو او اړونده ادارو د همغږۍ او مرستو ډېرولو په نیت ولیدل.
د کليو بیارغونې او پراختیا وزیر د اسیا لپاره د ملگرو ملتونو د پرمختیايي پروګرام له مشر څخه له افغانستان سره د کړیو مرستو مننه وکړه، چې د هېواد د زېربناء د رغونې، سیمه ييزې حکومتوالۍ پیاوړي کولو او د لمریزې برېښنا رسولو په برخه کې مهمې وې او په یادو برخو کې یې د مرستو ډېرولو ترڅنګ غوښتنه وکړه، چې د نړیوالو شریکانو مالي مرستې او پروژې باید د افغانستان دولت ملي برنامې مدیریت کړي او مالي مرستې یې باید د ملي برنامو تر چتر لاندې مصرف شي.
د اسیا لپاره د ملگرو ملتونو د پرمختیايي پروګرام مشر د کليو بیارغونې او پراختیا وزیر څخه مننه وکړه او زیاته يې کړه،" د ملګرو ملتونو د پرمخیتایي پروګرام(UNDP) او د اړونده دولتي ادارو ترمنځ به همغږي پیاوړي کړو او هڅه کوو، چې غوښتل شویو پروژو ته چې د اوبو رسولو، د کلیوالي مېرمنو تولیداتو ته د بازار موندلو او زېربناء په برخه کې دي ژر بودیجه پیدا کړو" .
د یادونې وړ ده، چي د ملگرو ملتونو پرمختیايي پروګرام د کليو بیارغونې او پراختیا وزارت ليټاکا او تلپاتې انرژۍ پروګرام سره ۳،۲ ميليونه ډالره مرسته کړي، چې د مېرمنو د لاسي صنایعو د ودې او لمریزې برېښنا رسونې په برخه کې یې کلیوالو ته ګڼې اسانتیاوې برابرې کړي دي.
