د لغمان ولایت علیشنګ ولسوالۍ کې د (۲،۰۸۹) کیلومتره جغل فرش سړک د جوړولو چارې پیل شوې
د لغمان ولایت د علیشنګ ولسوالۍ اړوند له واینګل سیمې څخه تر اولیا بالا پورې د (۲،۰۸۹) کیلومتره جغل فرش سړک د جوړولو چارې، د کلیو بیارغونې او پراختیا وزارت د کلیو ودانیزو چارو مرستیال الحاج محمد ارسلاح خروټي او مل پلاوي له لوري پرانستل شوه، چې نږدې (۲۰) میلیونه افغانۍ لګښت به ولري.
د یادې پروژې په پرانستې مراسمو کې د کلیو د بیارغونې او پراختیا وزارت د کلیو ودانیزو چارو مرستیال الحاج محمد ارسلاح خروټي، د لغمان ولایت د مقام مرستیال الحاج حافظ انځرګل عبدالله، د لغمان ولایت د کلیو د بیارغونې او پراختیا رئیس مولوي احسانالله ابو احمد، د اقتصاد رئیس مولوي عطاءالرحمن فاتح، یو شمېر علماوو، قومي مشرانو او ځوانانو ګډون کړی و.
په جوړو شویو مراسمو کې د وزارت د کلیو ودانیزو چارو مرستیال، د لغمان ولایت د مقام مرستیال او د لغمان ولایت د کلیو د بیارغونې او پراختیا رئیس، هر یوه په خپل وار د یاد سړک د اهمیت او ارزښت په اړه خبرې وکړې او د دغه سړک جوړول یې د سیمې د پرمختګ او بیارغونې په برخه کې یو مثبت ګام وباله.
یاد سړک چې په غرنيزه سیمه کې پروت دی، د سړک پر غاړه د (۲۹۶) مترو استنادي دېوال، د (۱۰) پایو پلچکونو او د (۵۳) مترو اوبو تېرولو ویالې یا کانالونو جوړول هم پکې شامل دي.
د یاد سړک د جوړولو د چارو په جریان کې به لسګونو تنو کارګرو ته د کار زمینه برابره شي او د پروژې له بشپړېدو سره به د سیمې د اوسېدونکو د تګ راتګ ستونزې تر ډېره هوارې شي.
