په ننګرهار کې د اوبو رسولو یوه لمریزه شبکه ګټې اخیستنې ته وسپارل شوه
د کلیو د بیارغونې او پراختیا وزارت، په کلیوالي سیمو کې د اوبو رسولو او حفظالصحې پروګرام اود یونیسف ادارې لخوا د ۳میلیونه، ۴۸۱زره او ۶۹۵ افغانیو په ارزښت ، د ننګرهار ولایت د ګوشتې ولسوالۍ په نوي اړخي ډاګ کلي کې د اوبو رسولو یوه لمریزه شبکه جوړه او ګټنې ته وسپارل شوه.
د څښلو د اوبو ددغې شبکې په جوړېدو سره، د نوي اړخي ډاګ د کلي څه باندې ۲۸۵ کورنیو ته د څښاک پاکې اوبه برابرې شوې او ددې پروژې په ترڅ کې شاوخوا ۱۸۰۰ کاري ورځې هم رامنځته شوې.
د اوبو رسولو په دغه پروژه کې د یوې ژورې څاه کیندل، د ۲۰ متره مکعب په ظرفیت سره د یوې ارتفاعي زیرمې جوړول، د ۱۴ لمریزو تختو، ۲۶۵۵ متره اوږدې شبکې او ۹۳ نلکو نصبول شامل وو .
