په تخار کې ۱۵۰ کورنیو او ۷۰۰ زده کوونکیو ته د څښاک پاکې اوبه برابرې شوې
د کلیو د بیارغونې او پراختیا وزارت په کلیوالي سیمو کې د اوبو رسولو او حفظالصحې د پروګرام له لوري د ۲.۶ میلیونه افغانیو په ارزښت د تخار ولایت د روستاق ولسوالۍ اړوند په شوراب چپه خانه کلي کې د اوبو رسولو یوه لمریزه شبکه جوړه او د ځايي خلکو ګټې اخیستنې ته وسپارل شوه.
ددغې شبکې په جوړېدو سره د شاوخوا ۱۵۰ کورنیو او د یوه ښوونځي د ۷۰۰ زدهکوونکیو لپاره د څښاک پاکې اوبه برابرې شوې.
په یاده شوې پروژه کې د یوې ذخیرې او د سولرونو لپاره د یوې احاطې جوړول، د څه باندې څلور کیلومتره اوږدې شبکې غځول، د ۱۴ تختو سولرونو، واټرپمپ او نورو اړینو وسایلو نصبول شامل وو.
د پروژې د جوړولو چارو دغه راز د ځايي خلکو لپاره شاوخوا ۲،۷۱۷ کاري ورځې هم رامنځ ته کړي.
