په بلخ ولایت کې ۱۰۶ کورنیو ته د څښاک پاکې اوبه برابریږي.
د بلخ ولایت د مارمل ولسوالۍ اړوند په پشت باغچه کلي کې د کلیو بیارغونې او پراختیا وزارت د ولسي تړون ملي پروګرام لخوا د څه باندې ۱.۵ میلیونه افغانیو په لګښت ۱۰۶ کورنیو ته د څښاک پاکو اوبو ته د لاسرسي زمینه برابریږي.
نوموړې شبکه ۱۶۷۲ متره اوږدوالی، د ۲۳ متره مکعبه اوبو د ظرفیت په لرلو سره یوه هسکه زیرمه او د اوبو یوه څاه لري. دغه شبکې ته ۶ نلکې هم جوړې شوېدي.
د دې پروژې د کار په بهیر کې تخنیکي او نا تخنیکي کاریګرو ته ۱۳۸۱ کاري ورځې را منځته شوېدي. د یادونې وړ ده چې په بلخ ولایت کې تراوسه د څښاک د پاکو اوبو ۱۷۲ پروژې بشپړې شوېدي او پر ۳۵ نورو پروژو باندې کار روان دې.
