د سولې او سرسبزۍ نیالګی
د کلیو بیارغونې او پراختیا وزیر پوهندوی مجیب الرحمن کریمي د سولې او سرسبزۍ نیالګی د( نیالګیو د کېنولو د ملي کمپاین) د ورځې د ملاتړ او نمانځنې په موخه د وزارت په انګړ کې کېناوه.
ښاغلي کریمي د نیالګیو د کېنولو په مراسمو کې وویل، د اقلیمي بدلون، خوندي او زرغون چاپیریال په موخه باید ټول هېوادوال د چاپیرل په خوندي ساتلو خپل ملي رسالت ادء کړي.
د کلیو بیارغونې او پراختیا وزیر وویل، څلوېښت کلن ناورین د هېواد چاپیریال ډير زیات زیانمن کړی او بیارغښت یې وخت او زیات کار ته ضرورت لري، نو اړتیا ده، چې د چاپیریال د خوندي ساتلو او جوړولو په برخه کې خپل مسوولیت له نن څخه پیل کړو.
د یادونې وړ ده، چې د افغانستان دولت به سږ کال نیږدې ۲۵ ميلیونه نیالګي کېنوي، چې د کلیو بیارغونې او پراختیا وزارت هم په کې فعاله ونډه لري او د کلیوالي شوراګانو په مټ به ولسي خلک دې ته وهڅوي، چې نیالګي کېنوي، ساتنه او پالنه یې وکړي.
