په کابل کې د څه باندې ۱ میلیون او ۸۰۰ زره افغانیو په لګښت د کرنیزو اوبو لګولو کانال د جوړیدو کار بشپړ شو
د څه باندې ۱ میلیون او ۸۰۰ زره افغانیو په لګښت د کلیو د بیا رغونې او پراختیا وزارت د ولسي تړون ملي پروګرام له لوري د کرنیزو اوبو لګولو د کانال د جوړولو کار د کابل ولایت د ګلدرې ولسوالۍ اړوند د ملک آغا کلي د پراختیایي شورا له لوري بشپړ او ګټې اخیستنې ته وسپارل شو. دغه کانال ۳۳۰ متره اوږد والی او محافظوي دیوال یې ۴۰ متره اوږدوالی لري. نوموړی کانال چې د سیمې د خلکو ۳۰۰ جریبه ځمکه به خړوبه کړي د جوړولو پر مهال یې ۲۵ تنو ماهرو اوغیرو ماهرو کاریګرو ته د دوه میاشتو او لسو ورځو لپاره د کار زمینه برابره کړې وه. د یادونې وړ ده چې له دغه کاناله د کلي د ۵۴ کورنیو ۳۶۷ تنه ګټه پورته کوي.
