په ننګرهار کې ۲۱۰ کورنیو ته د څښاک پاکې اوبه برابرې شوې
د کلیو بیارغونې او پراختیا وزارت، په کلیوالي سیمو کې د اوبو رسولو، روغتیاساتنې او اوبو لګولو ملي پروګرام له لوري د ننګرهار ولایت په د اچین ولسوالۍ په کهي لوی کلي کې د ۴.۳ میلیونه افغانیو په ارزښت د څښاک د اوبو یوه لمریزه شبکه جوړه او ګټې اخیستنې ته وسپارل شوه. ددغې شبکې په جوړېدو سره د شاوخوا ۲۱۰ کورنیو لپاره د څښاک پاکې اوبه برابرې شوه.
په یاده پروژه کې د یوې ژورې څاه کیندل، د ۲۰ متره مکعب په ظرفیت سره د یوې ارتفاعي ذخیرې او د سولرونو لپاره د یوې احاطې جوړول، د څه باندې ۲.۵ کلیو متره اوږدې شبکې غځول، د ۲۰ سولرونو، ۶۷ نلبندانونو، ۶۷ مېترونو او نورو اړینو پُرزو نصبول شامل وو.
د اوبو رسولو پروژه د کهي د کلي د پرمختیايي شورا پر مټ تطبیق شوه، چې د جوړولو چارو یې د ځايي خلکو لپاره په سلګونه کاري ورځې هم رامنځته کړې.
