په میدان وردګو کې د ۱۶.۸ میلیونو افغانیو په ارزښت د اوبو لګولو یوه پروژه ګټې اخیستنې ته وسپارل شوه
په میدان وردګو ولایت کې د کلیو بیارغونې او پرمختیا وزارت د سیمه ییز پروګرام له لوري د چک ولسوالۍ په کولک رشیدان سیمه کې د اوبو یو سر بند د ٢٣ متره په اوږد والي سره ګټې اخیستنې ته وسپارل شو. د اوبو دا سربند په سم او اساسي بڼه رغول شوی دی، چې د بند ساتلو لپاره ٣٩٣ متره محافظوي دېوال لرلو تر څنګ ځمکو ته داوبو رسولو په موخه د ٣٣٦ مترو په اوږدوالي سره یو پوخ کانال هم لري، چې له ملي بودجې پرې څه باندې ۱۶.۸ میلیونه افغانۍ لګښت شوی دی. د یادې پروژې د تطبیق پر مهال ټولې ۱۲۳۲ کاري ورځې رامنځته شوي، چې د سیمې ګڼ شمېر تخنیکي او نا تخنیکي کارګرو ته یې د کار کولو زمینه برابره کړې وه. د یادونې وړ ده، چې په راتلونکې کې به له دې سربند نه سلکونه جریبه کرنیزه ځمکه او باغونه د اوبو لګولو تر منظم پوښښ لاندې شي، چې د سیمې د اوسېدونکو په اقتصادي وضعیت کې به پام وړ مثبت بدلون رامنځته کړي.
