په بغلان ولایت کې د پاکو اوبو رسولو (٨) شبکې ګټې اخیستنې ته وسپارل شوې
د کلیو د بیارغونې او پراختیا وزارت له لورې د بغلان ولایت کې د څه باندې (٥٣) میلیونه افغانیو په لګښت د پاکو اوبو رسولو (٨) شبکې نن د یو لړ مراسمو په ترڅ کې د یاد وزارت د سرپرست وزير الحاج ملا محمد یونس اخندازاده او مل پلاوي له لورې ګټې اخیستنې ته وسپارل شوې.
په یاده غونډه کې د کلیو د بیارغونې او پراختیا وزارت سرپرست وزير الحاج ملا محمد یونس اخندزاده، مل پلاوي، د بغلان ولایت والي الحاج مولوي عبدالرحمن حقاني صاحب، د یاد ولایت د بریښنا رئیس ملا سردار ولي حمزه، د دوشي ولسوالۍ ولسوال قاري محمد یوسف عمر، د بغلان ولایت د کلیو د بیارغونې او پراختیا رئيس مولوي عبدالواحد عبیده، سیمې علماء کرامو، سپین ږیرو او ځوانانو ګډون کړی وو.
په یادو شبکو کې (٤) حلقې ژوري څاګاني، د (٧) بابه کانکریټي ذخیرو جوړول، د (١٨٨٠) شیردهنونو نښلول، د (٢٩٠) سولر تختو نښلول او د (٦١٢٢٧) مترو په اوږدوالي پایپ غځول شامل دي.
ددغه پروژو د کار په جریان کې د سیمې سلګونه تنه کاریګرو ته د کار زمینه برابره شوي وه چې په بشپړیدو سره یې ددغه ولایت د بیلابیلو ولسوالیو (٣٨٤٨) کورنیو د څښاک پاکو اوبو ته لاسرسی پیداکړ.
