د کندهار کوچیانو ته د کلیوالي اقتصاد د پیاوړتیا ملي پروګرام لهخوا روزنیز ورکشاپ وړاندې شو
دکلیو بیارغونې او پراختیا وزارت دکلیوالي اقتصاد د پياوړتیا ملي پروګرام په کندهار ولایت کې د ۳۹ ښځینه سپماګروپونو ۲۳۸ غړو ته د کندهار ولایت په دامان ولسوالۍ کې د پروګرام د موخو د تشریح په اړه دوه ورځنۍ روزنه وړاندې کړه.
د دې ولسوالۍ اوسېدونکي چې تر ډېره بریده کوچیان دي، د ولسوالۍ په کچه د پروګرام له پلي کېدو راضي دي او پخپلو سیمو کې له پروګرام څخه د ډېرو سپماګروپونو د تشکیل غوښتنه کوي.
د یادونې وړ ده، چې د هېواد د ولس مشر د هغه فرمان پر بنسټ چې دولتي او غیر دولتي بنسټونو ته یې د کوچیانو د اقتصادي او ټولنیز ژوند د پیاوړتیا لپاره د ډېرې پاملرنې په موخه صادر کړی، د کلیو بیارغونې او پراختیا وزارت د کلیوالي اقتصاد د پیاوړتیا ملي پروګرام کوچیانو ته د هېواد په کچه خپل خدمتونه وړاندې کوي.
