د کلیو د بیارغونې او پراختیا وزارت له لوري په هرات ولایت کې د اوبو رسولو یوه سولري شبکه ګټې اخیستنې ته وسپارل شوه
د کلیو د بیارغونې او پراختیا وزارت له لوري، د وزارت او یونیسف دفتر په مالي مرسته د هرات ولایت د کهسان ولسوالۍ په کمانه کلي کې د څه باندې (۳۲) میلیونه افغانیو په لګښت د اوبو رسولو د یوې سولري شبکې چارې بشپړې او نن د یوې غونډې په ترڅ کې د دغه وزارت د سرپرست وزیر الحاج ملا محمد یونس اخندزاده او مل پلاوي له خوا ګټې اخیستنې ته وسپارل شوه.
په یاده غونډه کې د کلیو د بیارغونې او پراختیا وزارت سرپرست وزیر الحاج ملا محمد یونس اخندزاده، د هرات ولایت والي نوراحمد اسلام جار، مل پلاوي، د یاد ولایت د کلیو د بیارغونې او پراختیا رئیس مولوي عبدالسلام هجرت، یو شمیر نورو مسئولینو، سپین ږیرو او ځوانانو ګډون کړی وو.
په یاده شبکه کې د (۹۲) سولر تختو نښلول، د (۱۲۸ او ۲۰) متر مکعب په وړتیاوو د پاکو اوبو د دوو ذخیرو جوړول، د (۲۷۰) شیردهنونو نښلول او د (۳۲) کیلو مترو په اوږدوالي د پایپ غځول شامل دي.
د دې شبکې د کار په جریان کې لسګونه تنه کاریګرو ته د کار زمینه برابره شوې وه او په بشپړیدو سره یې د نوموړي کلي (۱۱۲۶) کورنیو د څښاک پاکو اوبو ته لاسرسی پیدا کړ.
