د کلیو د بیارغونې او پراختیا وزارت له لوري د مؤسساتو له استازو سره د همغږۍ غونډه ترسره شوه

د کلیو د بیارغونې او پراختیا وزارت د محترم وزیر الحاج ملا عبداللطیف منصور صاحب په مشرۍ نن له غرمې مخکې د مؤسساتو له استازو سره د اوبو او روغتیا ساتنې په تړاو د همغږۍ غونډه ترسره شوه.

په یاده غونډه کې چې د کلیو د بیارغونې او پراختیا وزارت په مقر کې جوړه شوې وه، د یاد وزارت محترم وزیر الحاج ملا عبداللطیف منصور صاحب، د کلیو ودانیزو چارو مرستیال الحاج محمد ارسلاح خروټي، د یونیسف دفتر او نورو مؤسساتو استازو ګډون کړی وو. 

د غونډې په پیل کې د کلیو د بیارغونې او پراختیا وزارت محترم وزیر الحاج ملا عبداللطیف منصور صاحب میلمنو ته د ښه راغلاست ترڅنګ، د یادې غونډې د اهمیت په اړه خپله ارزښتناکه وینا وکړه او وویل: زمونږ هېواد ډېر کار ته اړتیا لري، زمونږ او ستاسې ګډ مسوولیت دی ترڅو په کلیو کې د خلکو ستونزو ته رسېدنه وکړو او کوښښ به مو دا وي چې مستحقو خلکو ته پروژې ورسوو او ټولګټې خدمات وړاندې کړو.

دغه راز محترم وزیر صاحب د پروژو کیفیت ته اشاره وکړه او زیاته یې کړه چې د پروژو د پلې کولو پرمهال روڼتیا او تخنیکي چارو ته ځانګړې پاملرنه وشي او د کلیو د بیارغونې او پراختیا وزارت سره په همکارۍ پلې شي.

همداراز محترم وزیر صاحب د مؤسساتو د استازو خبرې په غور واوریدې او غونډه د دعائیې په ویلو سره پای ته ورسیده.