د کلیو بیارغونې او پراختیا وزارت د هېواد په څلور ولایتونوکې د جنوبي کوریا په مرسته د لمریزې برېښنا سترې پروژې پلي کوي

د کلیو بیارغونې او پراختیا وزیر پوهندوی مجیب الرحمن کریمي د جنوبي کوریا له سفیر راهي زا یانګ(Rahee zha hyoung)  سره نن د دوشنبې په ورځ د خپل کار په دفتر کې ولیدل.
د لیدنې په پیل کې د کلیو بیارغونې او پراختیا وزیر د جنوبي کوریا له مرستو مننه وکړه  او  د جنوبي کوریا له سفیر یې وغوښتل، چې د هېواد په لېرې پرتو سیمو کې د لمریزې  او اوبو برېښنا د برابرولو په برخه کې مرسته وکړي او ددې ترڅنګ یې د ظرفیت لوړولو په برخه کې د زیاتو بورسونو او د انیستيټیوټ کتابتون سره د لازمو همکاریو غوښتنې وکړې.
د جنوبي کوریا سفیر وویل، په راتلونکي کال کې به په  کندهار او خوست کې یو میګا واټ لمریزه برېښنا، په پروان کې ۶۰۰ کیلو واټه  د اوبو او لمریزه برېښنا او په بغلان کې ۴۵۰ کیلوواټه لمریزه برېښنا چمتو کړي.
د یادونې وړ ده، چې د جنوبي کوریا په مرسته د ننګرهار په دره نور ولسوالۍ کې ۲۰۰۰ کورنیو او ۱۴ روغتونونو ته د برېښنا برابرولو چارې عملا روانې دي.