د کليو بیارغونې او پراختیا وزیر د دایکنډي ولایت له والي سره ولیدل

د کلیو بیارغونې او پراختیا وزیر پوهندوی مجیب الرحمن کریمي نن د شنبې په ورځ د دایکنډي له والي سیدانور رحمتي سره د یاد ولایت د ستونزو د  اوریدو په موخه ولیدل.
د لیدنې په سرکې د دایکنډي والي د کليو بیارغونې او پراختیا وزارت له هڅو مننه وکړه، چې پروژې یې  د کلیوالي خلکو په ژوند کې مثبت تغییر راوستلی دی.
ده وویل، د دایکنډي خلک له زده کړو سره زیاته مینه لري او پرته له توپیر غواړي، چې ځوانان او نجونې یې زده کړې  وکړي، په داسې حال کې چې د یاد ولایت له ۴۵۷ ښوونځيو څخه تقریبآ نیم یې ودانۍ نه لري، که په شپږ زره ښوونځيو کې دایکنډي ته هم توجه وشي، یاده ستونزه به تر ډېره حل شي.
د دې ترڅنګ د دایکنډي والي په یاد ولایت کې د ولسي تړون ملي پروګرام نور ولسوالیو ته د غځولو او د فعالیتونو ډېرولو غوښتنې شریکې کړي.
د کليو بیارغونې  او پراختیا وزیر پوهندوی مجیب الرحمن کریمي وویل، د ۶۰۰۰ ښوونځيو د جوړولو په دوهم پړاو کې ۲۲۳ ښوونځي یاد ولایت ته په پام کې نیول شوي او د دوهم پړاو د بودیجې پیدا کولو  په موخه   چې ټول ۳۵۵۳ ښوونځي کیږي له نړیوال بانک سره ناستې لري.
د کلیو بیارغونې او پراختیا وزیر زیاته کړه، د یاد ولایت د کليو بیارغونې او پراختیا نوي ټاکل شوي رئیس ته یې دنده سپارلي، چې د دایکنډي مهمې اړتیاوې او د خپل ریاست د ارزونو راپور ژر شریک کړي.
د کليو بیارغونې او پراختیا وزیر وویل، د لویو پروژو د پلي کولو په برخه کې هڅې کوي، چې څو کلي په یو ځای ترې ګټه واخلي.