د ښځو پر وړاندې د تاوتریخوالي د مخنیوي په موخه د ۱۶ورځني کمپاین نمانځغونډه وشوه
د کلیو بیارغونې او پراختیا وزارت د کلیوالي اقتصاد د پياوړتیا ملي پروګرام د یوې رسمي غونډې په ترڅ کې د ښځو پر وړاندې د تاوتریخوالي د مخنیوي د ۱۶ ورځني کمپاین د نمانځنې په موخه ناسته وکړه.
آغلې لطیفه مجیدي د کلیوالي اقتصاد د پياوړتیا ملي پروګرام رییس، ددې کمپاین د ارزښت په اړه وینا وکړه او د پروګرام له کارکوونکیو څخه یې غوښتنه وکړه، چې له خپلو ښځینه همکارانو په ځانګړي توګه د کلیو په کچه له کلیوالو مېرمنو سره لا زیات په لوړې روحيې او ښه سلوک سره په کاري چاپېریال کې همکاري وکړي.
په ټولنه کې د ښځو د کردار او د هغو پر وړاندې د تاوتریخوالي د لمنځه وړلو په اړه د شعري بیتونو د کلمه او د هېواد په کچه د یو شمېر تاوتریخوالي بیلګې وړاندې کول، د تاوتریخوالي د مخنیوي لارې چارې او په دې اړوند په نورو موضوعاتو په یاده غونډه کې بحث تر سره شو.
د یادونې وړ ده، چې دا کمپاین هرکال د نومبر له ۲۵ نیټې څخه د ډسمبر تر ۱۰ مې په نړیواله کچه د ښځو پر وړاندې د تاوتریخوالي د لهمنځهوړلو په موخه په لار اچول کیږي، چې هدف یې د ښځو پر وړاندې تاوتریخوالي ته «نه» ویل دي.
