تیره اونۍ په هیواد کې د ۱۴ ښوونځيو ودانۍ جوړې شوي او د دریو نورو ښوونځيو کار بشپړتیا ته نږدی دی
د کلیو بیا رغونې او پراختیا وزارت د ولسي تړون ملي پروګرام د اقرا پروژې تر سیوري لاندې تیره اونۍ د میدان وردګ ولایت په جلریز او دایمیرداد، د کندز ولایت په امام صاحب، خان اباد، علي اباد او دشت ارچي ولسوالیو کې د ۱۴ ښوونځيو ودانۍ جوړې شوي او د کندهار ولایت په شګۍ، د نورستان په برګ مټال ولسوالیو او د غزني ولایت په مرکز کې به ۳ نور ښوونځي ډیر ژر ګټې اخیستنې ته وسپارل شي.
دا ښوونځي ۱۲، ۱۰، ۸، یا ۶ ټولګي، تشنابونه او د څښاک د اوبو څاه ګانې لري چې د جوړیدو په ترڅ کې یې تخنیکي او نا تخنیکي کارګرو ته ۵۴ زره کاري ورځې رامنځ ته شوي.
یاده دې وي چې بشپړو شویو ښوونځيو د ۳۰۰۰ زده کونکو لپاره د ښوونې او روزنې وړ چاپیریال رامنځ ته کړ او له جوړیدونکو ښوونځيو به ۱۳۸۰ زده کونکي ګټه پورته کړي.
سربیره پر دې د کلیو بیا رغونې او پراختیا وزارت د ولسي تړون پروګرام له خوا د میدان وردګ ولایت په جلریز، دایمیرداد او حصه اول بهسود ولسوالیو کې د ۷ ښوونځيو لپاره ۶ څاه ګانې ایستل شوي، ۱۰ مبرزونه او ۹۶۰ متره د احاطې دیوال یې جوړ کړی او ګټې اخیستنې ته سپارلی دی.
