د کلیو د بیارغونې او پراختیا وزارت د کلیو ودانیزو چارو مرستیال ټکنالوژۍ پارک څخه لیدنه وکړه
د کلیو د بیارغونې او پراختیا وزارت د کلیو د آبادۍ چارو محترم معین الحاج محمد ارسلاح خروټي نن وروسته له غرمې په داسې حال کې چې د سرک جوړونې رئیس مولوي فضل الرحمن عاصم، د کلیوالي پراختیا انستیتیوت رئیس حافظ محمد خان قریشي او د وزارت د انجنیري خدماتو رئیس انجنیر فضل الحق فضلي یې ملتیا کوله، د کلیوالي پراختیا انستیتیوت اړوند د ټکنالوژۍ پارک څخه لیدنه وکړه.
د کلیو د بیارغونې او پراختیا وزارت د کلیو د پراختیا انسټيټیوټ اړوند ټکنالوژۍ پارک یوه مهمه او تخصصي برخه ده، چې د کلیوالو مناسبو ټکنالوژیو د ترویج او د کلیوالو خلکو د ژوند د ښه والي په موخه رامنځته شوی دی. د دې اساسي هدف د ساده، کم لګښته او د چاپېریال سره سازګارو ټکنالوژیو معرفي کول او بنسټیزول دي، څو د کلیوالو سیمو اوسېدونکي ترې ګټه پورته کړي.
د کلیو ودانیزو چارو محترم مرستیال په یاد پارک کې له پرمختګونو، سولریزو سیسټمونو، میوه لرونکو او غیر میوه لرونکو ونو څخه لیدنه وکړه او اړوندو مسؤلینو ته يې لازمې سپارښتنې وکړې.
