په تخار ولایت کې د روغتیايي څښاک اوبو د ویش پیل
د کلیو د بیارغونې او پراختیا ریاست په همغږۍ او د یونیسف ادارې په مالي مرسته د تخار ولایت اشکمش ولسوالۍ اړوند بادګذر سیمه کې د ۶۵۰ کورنیو لپاره د روغتیايي څښاک د اوبو ویش پيل شو.
د تخار ولایت د کلیو د بیارغونې او پراختیا ریاست د انجینري خدمتونو عمومي مدیر وویل: څه موده وړاندې د یادو سیمې اوسیدونکي د ناپاکو او خټو اوبو د استفادې له امله په بیلابیلو ناروغیو لکه کولرا (اسهالات) اخته شوي وو چې د دغه ریاست په پرله پسې هڅو، له نیکه مرغه د یونیسف په مالي مرسته د دوو میاشتو په موده کې د څښاک صحي اوبه چمتو او ویشل کیږي. نوموړي وویل دغه سیمه څلور پراختیايي شوراګانې لري په ورځ کې د هر نفر لپاره ۷ لیتره پاکې اوبه د ټانکر په واسطه د پنچري افغانیه کلي څخه د ۲۲ کیلو متره واټن کې لېږد او ویشل کیږي. دا په داسې حال کې ده د تخار ولایت د کلیو د بیارغونې او پراختیا ریاست د دې ستونزې د اساسي حل په موخه د یادې سیمې د اوبو رسولو د شبکې پروژه په خپل پلان کې شامله کړې ده.
